Lunaio Regiña 1892/Agosto
| ←Luggio | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Agosto |
Settembre→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
« Andria Poistæ »
Creddi a mi che son zà vëgio
E me ceigo in scë zenogge:
Ch'o zà visto ciù d'ûn spëgio
E de sencie fäle dogge,
Gh'é a disdiccia maledetta
Pe ogni cösa remmenâ
Ti a sentiæ contâ Giumetta,
Ti a sentiæ contâ.
Quando a rögna a l'é in te cräve,
Perchè l'ûn dell'ätro ha puïa,
Quando pensan, çerte räve,
Solo ä croxe, a ûnn-a lûçïa.
Fra de lô se fan gambetta
No se tïan che a bûzarâ...
Ti a sentiæ contâ Giumetta,
Ti a sentiæ contâ.
Zëna a l'é tûtta in t'ùn sciäto
E no ghe ninte de fæto;
Zù a bordosso lì in t'ûn säto
Ghe o rimedio a questo ciæto:
C'ûnn-a botta de bacchetta
S'improvvisa o Çentanâ;
Ti a sentiæ contâ Giumetta,
Ti a sentiæ contâ.
Un remmescio, ûn piggia e pösa,
Rompi, stroscia, desfa, imp...,
Chi a vêu indrita, chi a vêu imbösa,
Se fâ tutto in t'ûnn-a votta;
Spendi spandi, a dïla sccetta.
A s'é stæta ûnn-a canâ;
Ti a sentiæ contâ Giumetta,
Ti a sentiæ contâ.
Ma ti creddi che in sciö serio,
Fra i ciù tanti, dexe a-o sommo,
Aggian solo o dexiderio
D'önorâ quello grand'ommo?....
Lì assettæ in sciä careghetta
Son lì lô pe fäse ammiâ
Ti a sentiæ contâ Giumetta,
Ti a sentiæ contâ.
A Colombo fâ de feste
Perchè ûn mondo o l'ha attrovôu,
Ch'o n'ha misso in te de peste
Con stò cangio esagerôu?
Che andâ attorno co-a coppetta
Tosto ò tardi o n'obblighiâ
Ti a sentiæ contâ Giumetta,
Ti a sentiæ contâ.
C'ûn cilindro e ûnn-a marscinn-a
Gh'é e comparse sensa speisa;
O l'é ûn aze chi se strinn-a
Pe mangiâ da stoppa aççeisa;
Sensa ûn sguäro all'etichetta
Te mostriö collâ ûnn-a spâ...
Ti a sentiæ contâ Giumetta,
Ti a sentiæ contâ.
Duî discorsci pe-i fanetti,
Duî zonzûri, e lì se giascia;
Due baracche, duî lûmmetti,
Poi... quarcösa pe-a ganascia;
Dui campioîn de... piccaggetta,
E ûnn-a troffia da mangiâ:
Ti a sentiæ contâ Giumetta,
Ti a sentiæ contâ.
Ti-i veddiæ pe-a circostansa
Cäfattæ in te çittadinn-e,
Imbriæghi d'importansa
Andâ incontro a-e lûsciandrinn-e
Che gh'han dæto dô corbetta
Quando Romma han öfisiâ,
Ti a sentiæ contâ Giumetta,
Ti a sentiæ contâ.
Ma, pe contro, in mëzo a ûn vello
De diamanti deslenguæ,
O fantasma d'ûn vascello
Vira a prûa verso a çittæ,
Mentre ûn vento de viovetta
O profûmma l'ægua sâ.....
Ti a sentiæ contâ Giumetta,
Ti a sentiæ contâ.
Tûtt'assemme comme ûn rombo,
L'esploxon d'ûn særa-særa,
Salûan l'ombra de Colombo
Tûtti i popoli da tæra;
Ma a sò tæra benedetta
Tutt'assorto in contemplâ,
Lê o se scorda, pe vendetta,
E tortûe ch'a gh'é costâ.
L'Adiantôu [1] però o te spaccia
Da-e cadenn-e o sò gran fræ,
E o te-i scarega in sciä faccia
Ai ciû grosci mandillæ,
Poi, tornando ä sò barchetta,
Piggia o largo e scenta in mâ...
Ti a sentiæ contâ Giumetta,
Ti a sentiæ contâ.
- ↑ Adelantado Bartolomeo Colombo fratello dell' eroe, fierissimo personaggio.