Lunaio Regiña 1892/A-o lettô
| Lunaio zeneize compilao da-o sciô Regiña & C. pe l'anno 1892 de A-o lettô |
Rivista profetica do' 92→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
A-O LETTÔ
Bonn-e paöle, peie nisse.
....Pe tûtto l'anno
e semme l'anno.
(o parmê).
Semel in anno risit Apollo.
Erasmo-Centurie.
No sò comme a l'andiâ, ma scrïto ho scrïto,
zù quattro versci, quattro paöle in cröxe;
e, pëzo ancon, che m'è toccôu fâ fïto,
fäne di callai comme fïsan nöxe:
ma aoa s'ho do spaghetto o poeì pensâ,
che a-o rischio son de fäme coggionâ.
2.
Ma sò che, doppo tûtto, se no son
nè versci do Cavalli e do Fogetta,
do Barnaba Sighæa[sic!], nè do d'Arton,
do Spinnoa, do Defranchi e do Conchetta,
do Martin Piaggio e do Gioanin Casassa,
nè do Bäçigalô... nisciûn m'ammassa.
3.
Coscì ûn barbotto, un gran checchezzatô
chi ha o vizio de parlâ sempre in sce l'effe,
sentindo dî che e faccie e-o fâ o pittô,
lê ch'o l'arriçça o nazo e o ve fâ beffe,
sensa che un'ombra de disegno o saccie
o re sostëgne ch'o sà fâ de faccie.
4.
Che gh'è, in fæto de versci, i tronchi e i cen,
che gh'è i lunghi, gh'è i cûrti, i belli, i brûtti,
ö sò; sò che bezêugna fäli ben,
ma versci poi, sò che ne femmo tûtti;
tûtto stà a vedde comme: e duî ch'ëan guersci
no poieìvan giäse sensa fâ di versci.
5.
Mi, che i devo contâ comme i dinæ,
che canto d'oëgio e sêunno co-i coverci,
aoa che i veddo nesci e deslighæ
comme ûnn-a botte che ghe manche i çerci,
quello che son restôu ve-o poeì pensâ......
freido, gianco, sbattûo comme ûn mortâ.
6.
Ma ä fin da föa, quello che è stæto è stæto,
ne faiö di ciù belli un'ätra votta;
ansi ve poeì sciallâ che g'ho sottræto
ûnn-a canson pe fâ ballâ a marmotta
che a v'avieìva demmuôu pe de segûo
e contentôu comme a sûssâ ûn agûo.
7.
Dunque, çerte veitæ che pêuan scontrâ,
semmo inteizi, son bûrle, o-e dixe ûn matto;
no stæ pe çerte fräsi a resätâ
che, se ben fossan mai paöle do gatto,
n'importa ninte, o ciù ch'importa o le[sic]
che no gh'è de malisia e no gh'è arfê.
8.
Per mi me contentiô se in quelli tanti
che han zà fæto o Reginn-a coscì ben,
o ciù aze no restiô de tûtti quanti,
ma licche-lacche ne sc[i]ortiô co-i sen;
mi, che n'aiva ciù sangue d'ûn recchêutto,
allegro e rosso comme ûn gambao chêutto.
9.
E aoa Zeneixi addio, l'è l'öa che sære,
perchè l'è tardi, e gïa di pellandroin;
sentì ûn pö che demöa! sentì che guære?
stæme allegri che l'anno o sä di boîn;
v'augûro, se ûnn-a sæta a no v'accoppa,
di figgiêu, de pallanche, e-o vento in poppa.