In occasione del terzo anno secolare/Salve Reginna

Da Wikivivàgna
In occasione del terzo anno secolare
dell'apparizione di N. S. di Misericordia in Savona
de Antogno Pescetto
Salve Reginna


[p. 33 modifica]
Versione della Salve Regina.


1.
Salve Reginna Moæe de teneressa,
Nostro soccorso in vitta da tutt’ora
Doçe speranza nostra de salvessa
Misericordiosiscima Signora,
Fæ che d’un santo ardò tutti avvampemmo
Mentre che salve ai vostri pê cantemmo.

2.
D’in esilio raminghi e desperæ
D’Eva tentâ e guagnâ misei figgiœu;
Nasciöi appenna a morte condannæ
A rœue d’immensi cruzj e pontaiœu,
D’in mezo a tanti affanni e a tante croxi
A Voî spedimmo a sciammi e nostre voxi

[p. 34 modifica]


3.
Da questa valle de sciummæe de centi
Tanto ciù trista quanto miserabile,
Onde ò mâ n’affangotta a tutti i venti,
A Voi sospiemmo ò Vergine adorabile
Sfogando tutti i guai di nostri cœu
Che i purghæ comme l’oro in to corzœu:

4.
Donca Avvocata nostra potentiscima
I misericordiosi Sguardi Vostri,
Onde a Region Beata fæ belliscima,
Voltæ per somma grazia ai centi nostri,
Mettendo a-e nostre lagrime ò sigillo
D’amê celeste e balsamo tranquillo.

5.
O Cariscimo Fruto Benedetto
Vergine câa dò vostro sen puriscimo,
Unico nostro etærno ben perfetto,
Finio che sæ st’esilio chi tristiscimo,
Degnæve de mostrâne frà i splendoî
Dò bællo Paradiso accanto a Voî.

[p. 35 modifica]


6.
Per Voî così da noî vostri divoti
Quest’umile preghëa seggie compìa,
Onde lasciù appendemmo i nostri voti
Cara Maria doçe clemente e pia
Ai vostri Santi Pê la donde seî
Oggetto etærno dò ciù gran piaxeî.

ITTINIO RICCALBO
Socio della Colonia Sabazia.