Europa 1660/3/3

by Zan'Andria Spinnoa

←Atto Segondo - Scena Quatorzexima

Œüropa de Zan'Andria Spinnoa Atto Terço - Scena Terça

Atto Terço - Scena Seteña→

SCENA TERZA.

CORTE:

Pometta.

Digghe chi voe, ch'unna Fantesca bonna
L'ę l'arneise megiò, ch'haggie unna cà,
Và miegio ri servixi,
Che à loegh'e tempo à fà.
Cose orrei fà d'un seppo,
Chi nò se saccie ni mescià, ni voze?
Chi stagghe li intredita
Com'un poll'intra stoppa,
E n'escie moę d'un fęto?
O gh'è tanto da fà.
Saveì dì doe parolle à emendamento,
Savei fà unn'ambascià,
Esse da tutti tempi, andà, vegnì,
Savei intrà, e uscì,
Fàse da tutte muin,^[1]
E portà besognando un biggettin?
Se n'era mi, Frorindo stava fresco,
E mę Patrona haveiva
Zoeggia rò sò biggietto. Aora all'incontra
s'han dęto rò sò orde bell', e bon,
E s'han da vei staseira intro giardin;
Questo è quello ch'han dito,
L'atro ro canta l'organo,
L'intendereiva un soeccaro.
Mà zà che lò se voeran trà bon tempo,
Nò voeggio manco mi stà à mondà nespore.

Se com'ambra ę ra Patronna,

Comme paggia ę ra fantesca;
Quella ę freida? e questa ę fresca.
Là ghè cioeve? e chi ghe tronna.
In doe parolle senza tant'archimia
Se l'unna fà, l'atra voè fa ra scimia.

Mà questo ę un bello intrigo;
Che me troevo havei dęto
Dui appontamenti in un; n'importa un figo:
Son donna de partio
E sò Zugà à ciù tore.
Chi se perde, sò danno.
Vegne ro Caporà, vegne ro Zembo,
Che fassando ro matto
A tutti dui ghe troverò recatto.

1. muen (1665)