Due brocche de viovetta/I Remaggi
| ←Nêutte de San Silvestro | Due brocche de viovetta de I Remaggi |
Domenega grassa→ |
| ed. www.liberliber.it 2010 |
I remaggi en trei vegetti
sensa sosta e sensa arfê;
e sciallâ fan i pivetti
e son boîn comme l'amê...
i remaggi en trei vegetti.
Han trei belli tettæ gianchi,
cöran squæxi comme o vento;
van e van, no son mai stanchi,
no se pösan ûn momento:
han trei belli tettæ gianchi.
Van e van sciù pe-a montagna,
van pe-o bosco, pe-a valladda;
ûnn-a stella a-i accompagna,
e a fa ciæo pe tûtta a stradda:
van e van sciù pe-a montagna.
G'han de tûtto in t'ûnn-a sporta,
tûtto bello e tûtto bon...
dormi cäo, son zà dä porta,
quacci quacci, in aggueiton...
g'han de tûtto drento ä sporta.
Sitto bæ, caccite sotta,
presto sotta, in ti lensêu,
che se no, ghe säta a futta
de sentî cianze i figgiêu:
sitto, bæ, caccite sotta.
Siit!.. ti senti?.. ton... ton... ton...
i remaggi en zà dä porta:
g'han do bello e g'han do bon
pe i figgiêu bravi in ta sporta:
siit!.. ti senti?... ton... ton... ton...
Cäo, doman.... Ma zà o bamboccio
o l'é preizo e ciù o no mescia;
e de bonn-e a fa ûn scartoccio
pe doman, quande o s'adescia,
a mammà pe-o sò bamboccio.