Doroi de pansa

Doroi de pansa caosæ da ra democraçia a ri doi oligarchi Benardo e Baciccia
Sonetti
de Françesco Cucchi

exemprâ conservao inta Libraja de Stoia Moderna e Contempoannia de Romma

LIBERTÉ EGUAGLIANSA

DOROI’ DE PANSA
CAOSÆ DA RA DEMOCRAZIA

A RI DOI OLIGARCHI

BENARDO E BACCICIA

SONETTI

Ninte me maraveggio, perchè sò mì,

Quello, che se dixeiva in ogni canto;
Roba, Bernardo cao da fâ stordî,

Da fâ scappâ a pazienza fina a un santo.

Ghè dî voì poco? vêise prostituì

I nostri Emblemi che costavan tanto?
Ra Buscoa rossa, e o Libro d’Oro ascì

A o fœugo destinæ, e aò nostro cianto?

Se poesse rimediâ a sto imbaraçço.

Farèiva voto d’esse un pò ciù à man,

Lasciandome toccà comme un ragaçço.

Per dive a veritè: ogni cristian

Dixe, che intanto sêmmo andeti a sguasso

Per o naso dúo, e l’operâ da Can.

Ahimè! caro Zerman mœuro d’angoscia!

Mi quæxi non sò ciù quello, che fasse!
In questi giorni amai tutto me fruscia!

Se l’han piggiâ con noi fin-na e lumasse

Ognun ne sciorte fœua d’in trà so sguscia.

Con dî ra so raxon sciù tutte e ciaççe,
E Ziardoe parèmmo, che fan smurscia

(A fraze per piggià dre genti basse.)

Chi l’aesse mai pensao caro Baccicia:

Chi paieva^[1] che tremasse a nostra vista.

L’e stæto o primmo a insorge con ra miccia.

Questa a se ciamma una figura trista,

A reisego avei misso a nostra ciccia,

Per varj Promotoì, capi de lista.

Cucchi