Donaver Antologia 1910/A canson da scignoa bella
| ←torna a lista di atri scriti | A canson da scignoa bella de da l'Antologia do Donaver do 1910 |
torna a l'endexo→ |
Procuratore; nato il 29 agosto 1831; morto il 17 febbraio 1907.
Son nasciûa sott’a ûnn-a stella,
Dixan tûtti fortûnâ,
Perc’ho sempre faeto a bella
Da fantinn-a e da majâ;
— Quand’eo figgia, meschinetto,
Mae pappà tiava o carretto,
Aoa poi che son majâ
A-o mae Pippo ö fasso tiâ.
No foss’atro, pe-a demöa
De fâ ûn po da figûrinn-a,
No stae manco in casa ûnn’öa
Se me voessan fä reginn-a;
— Passo allegra in mezo ä gente,
Gïo l’êuggin continûamente,
Porto sempre zù o velletto,
E e mae frecce fan ciù effetto,
(E o mae Pippo o tïa o carretto!)
Co-a perrûcca ben spremmûa,
Co-e fädette alleitûghae,
E co-e gambe abbandonae,
Mi ho l’idea d’ûnn-a fissûa,
Invenzion moderna e mae
D’ese brutta e fâ figûa,
D’andâ savia e fâ o galletto.
(E o mae Pippo o tia o carretto!)
Me diverte i spaximanti
Quando i fasso invexendâ
Quando i veddo a-o cô di guanti,
Giando l’êuggio, regattâ
Tûtti a-o son do me tacchetto.
(E o mae Pippo o tïa o carretto!)
Se e me grazie poi dispenso,
Se me vorto a discorrî,
Çerco sempre o ciù melenso
Per lasciâlo sempre di,
No impegnâme a raxonn-â,
Poeì fâ rode chi me pâ,
Dâghe riendo ûn po o balletto.
(E o mae Pippo o tïa o carretto!)
Cö cangia d’ogni stagion
Perdo a bûscioa da raxon,
E me metto a fâ o pedon
Pe san Lucco e pe san Scî[1]
Tûtte e modde a descrovî
Tutti i prexi a fâme dî,
E i Biggetti[2] me pän zetto.
(E o mae Pippo o tïa o carretto!)
Fasso lûsso fin che posso,
Finche regna a fresca etae;
Poi m’accatto ûn libbro grosso,
Vaddo a giâ tutti i artae;
— Co-i avansi da bellessa
Troviö gratis qualche messa;
E o mae Pippo, meschinetto,
Per de lungo o tïa o carretto!
(Chì ûnn-a vose d’in t’ûn fosso
Co’ ûn rimbombo da cannon
Ghe sbraggiò: « Ti l hae in te l’osso!
« Ma fortûnn-a che no son
« Tûtte e belle comme ti,
« Che ghe n’è de brave ascì,
« E o sò Pippo, meschinetto,
« No fan moî sott’a-o carretto!)