Discorso in lengua zeneize doppo l'eleçion do Seeniscimo Duxe de Zena Antogno Çebà/Parte terça

by Bernabè Çigâ Cazê

←Parte segonda

Discorso in lengua zeneize doppo l'eleçion do Seeniscimo Duxe de Zena Antogno Çebà de Bernabè Çigâ Cazê Parte terça

Parte quarta→

TERZA PARTE.

Che diremo de quelli, chi no fan
Arte nussunna, ma a sorazzo van,
E in derno mangian pan,
Ni fan vegnì da beive o da mangià,
Ni da vestì, ni da mercantezà,
Ni vòren navegà,
Ni chiantà vigna, o semenà ra terra,
E inimixi mortali son dra guerra,
Ni pagan a ra Terra,
Cabelle, o tascie, e moè no re pagàn
Ni men per l'avegnì re pagheràn,
E l'arte che lò fan,
Atro no è cha de spennà Pecchioin,
E perà re minchionne, e ri minchioin,
Per questi te potroin
Ri Segnoi espediente pigieran
Conveniente a ra sò Regia man,
E Zena purgheràn.
Dri soverchi se pon Colonie fà,
E in Corsega mandàri a cultivà:
Doi ben verremo a fà,

Prima de boche se desgraveremo,
E sussidio da lò pò caveremo:
E norma pigieremo
Da Chineisi, chi han tente gren cittè,
Chiù cha Parìs de Franza grosse assè,
E megio populè,
E si gh'è tà cittè tutt'habità,
Ch'è longa ro camin d'una giornà
Da un cavo a l'atro andà;
Cinquanta mirioin d'homi fa ra Chinna;
Tutta ra terra de cavalli è pinna,
De legni ra marinna.
E tente gente tutti richi son,
E ognun de lò a quarche cosa è bon,
Ni se ghe vè un potron:
Per questo quella terra ha tanto ben,
Perchè gente si feta a no manten,
Ni d'otiosi a ten,
Ch'una parte de lò va a navegà,
Un'atra ri terren a cultivà,
I arteisi a lavorà,
E ri mercanti a fà ra mercantia,
Ra nobiltè ha in man ra Signoria,
Ro resto a ra garia;

E chi no vò stentà per vorentè,
Maneza un remo per necessitè
De ferro incadenè.
Ra giustitia fà inguà ra sò sententia;
Poveri, e richi senza defferentia
Ognun sta a obedientia.
E se quello che digo no ve crei,
Ro libero dra Chinna pigierei,
E si ro lezerei,
Fò poco fà esto libero mandaò
A Papa Sisto Quinto dedicaò,
E a Roma l'han stampaò.
Se ri Chineisi adonca imiteremo
In tutto o in parte, o in quello che possemo,
No è dubio c'haveremo
Abondantia, Giustitia, Aviamento,
E Zena vegnirà d'oro, e d'argento,
E si ho quasi ardimento
De dì, che ri citten Segnoi verreivan,
E fabriche stupende si fareivan:
Ra terra crescereivan
D'in Besagno a ri borghi de Fasciò
Sent'Anna, e Mortuò fin a ro Mò,
E a Zena, ma chiù fò

Re strade larghe, e chianne se fareivan,
Onde carri, e carrocchie passereivan,
Per terra portereivan,
Ogni, ben chi se può desiderà,
E re Nave, e carrache de ver Mà
Ogni dì quarche pansà.
Ra gente, e ro negotio crescereiva,
E un nòvo Cairo Zena vegnireiva,
E fà se ghe porreiva
A exempio de Venetia un Darsenà
Capace come quello d'una Armà:
E assè dre case^[1] fà,
Si come adesso ne facemo poche
Ma insimo omoè de dentr'o prao de y oche.

1. corretto a penna cose