Discorso in lengua zeneize doppo l'eleçion do Seeniscimo Duxe de Zena Antogno Çebà/Parte quarta

Da Wikivivàgna
Discorso in lengua zeneize doppo l'eleçion
do Seeniscimo Duxe de Zena Antogno Çebà
de Bernabè Çigâ Cazê
Parte quarta
[p. 21 modifica]
QUARTA PARTE


No staghemo castelli in ere a fà,
Ma cose chi se pon effettuà
Fin d'aora a ra giornà,
Fra y atre a mè parei sareiva ben
Fà come ri Segnoi Venetien
E y atri Italien,
Chi de grossi ducati batte fan,
E son de questi che per Zena van,
E guagno lò ghe fan,
Che dri chiù grossi batte ne facemo.
E doble, e scui d'argento ghe dighemo,
Se a l'oro y agiustemo,
E a questo mòo faremo come lò,
Acquistandone inseme util'e honò,
Ni ghe pò esse errò,
Ra monea forestera o se ne vaghe,
O a manco prexo se valute, e daghe,
E a quello ferma staghe.
E no ra posse cresce ni carà
Sarvo quelli Segnoi, chi ro den fà,
Per mantegnìra tà:

[p. 22 modifica]

Cosi fazzando a no ghe vegnirà,
O in utile comun se spenderà,
O se ne tornerà;
Bona monea adoncha se maneze,
Cosa và doze no se mette treze.
Dighemo aora dra leze;
Atro no è ra leze in veritè,
Che dro giusto Segnò ra vorentè,
E si l'offende assè,
Chi ardisce de no esse obediente,
Però se dè punì severamente;
E pà conveniente,
Che o vero no se dè ra leze fà,
O feta, monto ben fàra osservà,
E a chi vò contrafà
Gh'è bonna ra segnèra, o l'Ostracismo,
Perchè ghe vegnirà ro paracismo.
Mi dentr'a mente rismo
Ch'era zà eletto tanto tempo fà
Per Duxe dra Cittè ro gran CEBA['],
Perchè l'è un'anno zà,
Che per pubblica voxe, ell'era feto,
E ra voxe de Dio si ne l'hà deto:
Eletto senza afoeto

[p. 23 modifica]

Un'homo fermo come un Codemonte,
Chi vozerà quell'honorata fronte,
E y ongie, e re moen pronte
A rebatte y ingiurie dra cittè;
E a defende ra nostra libertè,
L'honò, e ra dignitè:
Che se ben l'è co ra sò barba gianca,
L'è zove d'agni, e ra virtù si ha franca,
Ni l'annimo ghe manca,
De mostràsse un Horatio un, Scipion
In ogni ressoluta occasion.
Ra Signoria ancon
No lascie ri secretti inscì da lò,
Come a tempo seguì d'un Senatò,
Chi haveiva questo humò,
Che quello che in Senato se trattàva,
E ch'un dixeiva, e l'atro replicàva,
A sò mogiè contava,
E lè dapòscia a y atre ro dixeiva,
Così per tutto Zena o se saveiva.
De chiù arregordereiva
Che ro paeise nostro bello, e bon
De là da monti verso l'Aquilon,
E de sà l'atro ancon

[p. 24 modifica]

A ra riva dro Mà verso Oriente
E quello ch'è desteiso a ro Ponente
A noi apertinente,
Chi fa d'un corpo co re brazze forma
E Zena è testa, e ra Liguria forma,
Si è pin de gente corma
D'amò, d'honò, de gran fidelitè,
Cointo tegnì se ne devesse assè,
E a lò, e a ra cittè,
Fà gratia che personne ben nasciùe,
E d'honò, de fortuna, e de virtùe,
Possen cresce, e vegnì ssùe;[sic]
E assò che ro bon staò sè chiù durabile,
De fà ch'ogni citten ch'è magistrabile,
Sarvo s'o fosse inhabile,
Participe in l'honò, e in ro governo
Per faro se se poeisse ancora eterno,
Perchè se ben discerno
Dixe messè Aristotile Reale
Che fit seditio propter inequale.