Dialogo fra-o sciô Reginna e o Taggiaborse

Da Wikivivàgna
Dialogo fra-o sciô Reginna e o Taggiaborse
insci-a sciortia de Foxiñe de vêi.
Zena, Stampaja Franchello. Exemprâ conservao inta Libraja Naçionâ de França, da-a coleçion do Paul Ristelhuber
transcriçion dipromattica


[p. 1 modifica]
DIALOGO

FRA Ô SCIÔ
REGINNA
E U
TAGGIABORSE
IN SCIA SCIORTIA DE FOXINNE DE VEI




ZENA, Stampaja Franchelli Ciassa S. Loenso.

Con permission.


[p. 2 modifica]

Reg.
Doppo tanti, tanti mæixi
D’ese stæto a dormï ä foxe
No gh'oia âtro che i Zeneixi,
No gh'oia âtro che a Casazza
Pe fä izame torna sciû
D’in te quello fosso grande
Che ghe ne stë sempre ciù.

Tag.
Anche mi Reginna cao
M’é vegnuo a bella intenzion
De da un pô l'addio au diäo
Za che ghea quest’occaxion:
Quand’ho sentio menzonnâ,
Da u me amigo meistro Tacco
Cu vegnïa le ascì dessà
Che sciortï deve e Foxinne
In gran sciato e che se spendan
De miggea de roscinne,
No m’ho ciù posciuo fermâ
O ousciuo intrâ torna in Portoja
Dove quando mi viveiva
Te sovven che bella istoja,
Cosse ho fæto de furrô
Coi me çeoti e ciarlaxia
Creddo d'ajme fæto onô
Tanto ciû che dopo poco

[p. 3 modifica]

Che là â foxe m’han pôsou,
Ho sentio che no son stæto
Dai Zeneixi poi scordou;
Che in te queste occaxionette
Favan mi resuscitâ
E me faan anche parlâ,
Euggio andâ o dito fra mi
Euggio andâ o dito in personna
Vedde a gran Casazza, e poi
Dï sa l’è cattiva, o bonna,

Reg.
Anche a ti te sovegnûo
Quella tale Casazzetta
A quæ quando noj viveivimo
Se levavimo a beretta?
E in veitè me son accorto
Quando l’ho avûo visto væi,
Cäa Casazza che ti ë sempre
Quella che unna votta ti æi,
Anzi ho visto ch’an azzunto
E tant’öu, e tant’argento
Ch’u le giûsto un væu portento

Tag.
Anche mi ho visto de cose
Che n’aviè mai ciù credûe
Se coi œggi non i avesse
Ben ammiè, e ben conosciûe.

[p. 4 modifica]

Reg.
Ti ë visto i dui giganti
Che vegnia pei primmi avanti;
Che duì belli pastorali
Favan puja solo a ammiali,
In te l'öu paivan ficchè,
O che cappe, o che grassé,
Che disegni, e disegnin
O che ricchi tabarrin,
E quell'âtra bella teja
M'e parsciuo vedde una veja,
O che bello, e gran confaon,
Che pittûa, e immaginnazion.
E quelli atri Pellegrin
Favan gusto de sentili
O che belli strunellin
O che belle voxettin-ne:
E no divo l'elegante
E assæ ricco Giacomin
In fra le, e o so cavallin
Ean duî vei muggetti d’öu.
O che bella croxe, e canti,
Di Tenzoï, Spirito Santo,
Quella di Anime purganti
Quella da Nativitè;

L'âtra poi di Perruchè,
Che travaggi d’öu, e argento

[p. 5 modifica]

Che trattuga, che portento,
E quell'ätra gran montagna
De zecchin chi passegiava
Che ricchezza, che cocagna
U l'ëa u Möu chi figurava.
O che bello travagetto
O che celebre scôpello
Do famoso Maraggian
Cose o comparia mai bello.

O che canti stramesuè,
Che portôi che stramuoeì
Cose proprio da no dî.

E quell’âtro poscituese;
De braviscimo Serin
Che concerti e ritornelli
Che sunate de violin;
E ti è visto quella mostra
De sguassose cappe d'öu
Che portava i frè du Möu
Ean du bravo sciô Poistè.
E quell'âtri pochi lummi,
Ch’ea ao Cristo ti è ammiè

Tag.
Ben che ho visto, an sbarassou
E butteghe di candiè

Reg.
Finarmente quande ho visto
Quella cascia presentâ

[p. 6 modifica]

Cao amigo Taggiaborse,
Dâo piaxei no poeiva stâ;
Bravi, bravi, i Carboné
S’an sapûo fa ben onô
In portà, pe un giorno intrego
In scie spalle u gran Maggiô.

Tag.
Cäo Reginna ti è vantoû
Oni croxe, e non lascioû
Serrin, Cascia, Cristo bello,
Ma ti t’è scordôu i frë,
E so cappe ricche assè
Quella bella calsatûa
Quella so grande tegnûa
Quella bella precixion
Infin tutta a bella union.

Reg.
Questo sci confesso o vëo,
L'öu, l'argento, e tutto a rëo
Mi m’han quëxi imbarlugoû
E coscì me l'ea scordoû.

Tag.
Cao Reginna puemo andà
Tutti allegri, e ben contenti
D'ese un po vegnûi a ammiâ
Tutte queste belle cose,
Tutte e maume sci vistose
Che nisciun quëxi se credde
Atro che quello chi e vedde.

[p. 7 modifica]

Reg.
Noi andiemo a di lazzù
Che per Zena de Settembre
Emmo visto cose tali,
Che non se veddiâ maiciù

Tag.
Ma aôa chi besogna andá
O congè o le limitoû.
Mi nö assè: ho visto a Casazza
E me son proprio demuoû.

Reg.
Taggiaborse ti dî ben
Se fa tardi e andà conven,
An rubado incaminâse
E din te demue levâse,
Noi puriescimo ben vantà
Che i Zeneixi, e i Fuxinanti
An sapûo ben fâse onô,
E mostrâ quë di dui santi,
Seggie proprio o vëo maggiô.