De Franchi Comeddie 1781/Re furbarie de Monodda/III7
| ←Scena VI | Re furbarie de Monodda de Atto III - Scena VII |
Scena VIII→ |
| a m co-a tirde a l'é stæta reiza co-a doggia m (mm) |
Geronzio, Argante, Tiburçio.
Ger. Ah caro sciô Argante son chì pin de desgrazie.
Arg. E mi pezo che voî sciô Geronzio.
Ger. Quello faccia de sbiro, boia de Monodda, con uña furbaia da galeotto o m’atrapaò çinqueçento scui.
Arg. E o mæximo pendin da forche de Monodda con un’âtra furbaria, o m’ha atrapaò duxento doppie.
Ger. O non s’e contentaò de piggiame i çinqueçento scui solamente ma o m’ha trattaò d’una manera, che ho vergœugna a parlane. O me a pagherà.
Arg. Vœuggio ch’o se ne regorde fin ch’o campa da vendetta, che penso de fâ.
Ger. E mì pretendo de dâ un exempio mai ciù visto, e sentio.
Tib. (a parte) Ho poia, che ghe sarà a mæ parte per mì ascì.
Ger. Ma caro amigo non v’ho ancora dito tutto. Aprœuvo a uña desgrazia ordinariamente ne sole vegnî un âtra. Me ero consolaò con a speranza d’aveì mæ Figgia, e aora sento da o mæ Ommo, che l’è tanto tempo, che a l’è partia da Trieste, e se credde che se sæ perso o bastimento donde a l’era imbarcâ. Arg. Ma per che motivo a tegnivi a Trieste, e non ve davi piaxeì de tegnira con voî, chi a Zena?
Ger. Gh'aveivo e mæ raxoin sorve de questo, e i interessi da mæ Famiggia m'han obligaò a tegnî segretto o segondo matrimonio. Ma cose veddo!