De Franchi Comeddie 1781/Re furbarie de Monodda/III11
| ←Scena X | Re furbarie de Monodda de Atto III - Scena XI |
Scena XII→ |
| a m co-a tirde a l'é stæta reiza co-a doggia m (mm) |
Argante, Geronzio, Ottavio, Giaçintiña, Florinda, Tiburçio.
Arg. Vegni Ottavietto figgio caro, vegni a rallegrate dell’aççidente fortunaò do tò matrimonio. O Çê....
Ott. Nò pappà caro, tutte e vostre proposizioin de matrimonio no serviran a ninte. Mi devo levame a maschera con voî; e zà saveì o mæ impegno.
Arg. Scì, ma ti no sæ...
Ott. Sò tutro quello che devo saveì.
Arg. Te vœuggio dî, che a figgia do sciô Geronzio....
Ott. A Figgia do sciô Geronzio non sarà mai per mì.
Ger. S’a l'è quella...
Ott. Nò Signor ve domando perdon, e mæ resoluzioin son piggæ. (a Geronzio)
Tib. (a Ottavio) Stæ a sentî...
Ott. Taxi tì non vœuggio sentî ninte.
Arg. (a Ottavio) Tò moggê...
Ott. Nò Pappà caro, ve diggo, che ciù tosto morirò che abbandonâ a mæ cara Giaçintiña. (traversando il Teatro si va a fermare appresso a Giacintina) Scì poeì fâ tutto quello che voreì. Ho zuraò fedeltæ a questa, e l’amerò tutto o tempo da vitta mæ, nè vœuggio âtra moggê che questa.
Arg. E ben. Ti ê stordio. questa l’è quella che te daggo per moggê.
Giaç. (additando Geronzio) Scì caro Ottavietto questo è mæ Poære, e coscì semmo contenti fœura d’ansietæ.
Ger. Andemmo in casa, che staremmo megio, e ciù in libertæ.
Giaç. (additando Florinda). Ah caro Pappà ve domando in grazia de non voreì che reste separâ da questa amabile Persoña, che veì. A l’ha un merito sorprendente, chi ve farà concepî da stimma grande per lê quando l’avereì conosciuo.
Ger. Ti vœu che tegne in casa uña Persoña iñamorâ de tò Fræ, e chi ha dito poco fà tante insolenze de mì, sciù a mæ faccia?
Flor. Ve domando mille scuse sciô Geronzio. Non averæ parlaò in quella manera, se avesse sapuo che foisci voî quello de chi parlavo. Non aveivo l’onô de conoscive solo che per fama.
Ger. Comme per fama?
Giaç. Pappà a passion che mæ Fræ ha concepio per questa Zovena a l’è tutta appoggiâ sciù i limiti da virtù, e dell’onestæ.
Ger. O quest’è bella! non voresci miga che mariasse mæ Figgio con uña, da quæ non se sà a condizion, e i natali, assuefæta a scorattâ per o mondo?