De Franchi Comeddie 1781/Re furbarie de Monodda/II10
| ←Scena IX | Re furbarie de Monodda de Atto II - Scena X |
Scena XI→ |
| a m co-a tirde a l'é stæta reiza co-a doggia m (mm) |
Argante, Monodda.
Mon. (guarda verso la scena)E ben eì visto quanta gente o l’ha amaççaò per duxento doppie? stæme alegro, ve prego boña fortuña.
Arg. (tremando) Monodda?
Mon. E ben?
Arg. Son resoluto de daghe queste duxento doppie.
Mon. Me ne rallegro per vostro ben.
Arg. Andemmo a çercaro, che i ho adosso; son chì pronte.
Mon. Dæ chì, che ghe e porterò mì. Non è vostro decoro, che ve ghe presentæ davanti, doppo aveì fæto chì un’âtra figura diversa da quello, che seì; e de ciù averæ poira, ch’o ve domandasse quarcosa d’avantaggio.
Arg. Ti dî benissimo, ma voræ pagâ i me dinæ con caotela.
Mon. Comme! non ve fiæ de mì?
Arg. Non diggo questo... ma...
Mon. Poter de bacco! O che son un furbo, o che son un ommo comme se dæ? Ve credeì forsi, che mi ve vœuggie ingañâ? In tutto questo non gh’o âtro interesse, che o vostro, e quello de vostro Figgio. Se non ve fiæ de mì çerchæve quarcun âtro, che mi non me ne vœuggio ciù imbaraççâ.
Arg. Piggia chì donque. (in atto di darli i denari)
Mon. Nò signor, no signor, se no son da fiâ, l'è ben che ve servî de quarche d’un âtro.
Arg. Oh, non me fâ ciù scene piggia chì. (come sopra)
Mon. Ve diggo de nò, e de nà. Non ve stæ a fiâ de mì. Chi sà, che non ve vœuggie truffâ i vostri dinæ?
Arg. Piggia chì te diggo, non me rompî ciù a testa (le dà i denari); ma guarda ben, de piggiâ e tò mezure.
Mon. Lascæme fâ a mì, che no son tanto inderê de scritura.
Arg. Mi te vaggo a aspetâ in casa. (via)
Mon. Stæ quieto, che sarò da voî. (solo) E un... Bezœugna che çerche l’âtro. Ma guardæ quando se dixe! o l’è giusto chì. Pâ che o Çê i faççe cazze in tro sorchetto un doppo l’atro.