De Franchi Comeddie 1781/Re furbarie de Monodda/I6
| ←Scena V | Re furbarie de Monodda de Atto I - Scena VI |
Scena VII→ |
| a m co-a tirde a l'é stæta reiza co-a doggia m (mm) |
Argante, Monodda, Tiburçio.
Arg. (credendosi solo in fondo del Teatro) S'è mai sentío a o mondo un’açion pareggia de questa? Mon. (a Tiburçio) O l’ha zà scoværto l’affare! e o l’è tanto in te furie ch’o và parlando da lê comme i matti.
Arg. Che gran temeritæ! (credendosi solo)
Mon. (a Tiburçio) Stemmo un pô a sentî.
Arg. Vorræ saveì cose o me porrà dî de questo sò bello matrimonio!
Mon. (a parte) Gh’emmo zà pensaò.
Arg. (come sopra) O çercherà de mettese sciù ra negativa.
Mon. Per ninte... non ghe pensemmo manco.
Arg. O çercherà de scusase in quarche manera.
Mon. (a parte sempre) Questo se porrà dâ.
Arg. (come sopra) O pretenderà de contâme de fôre, de belle invenzioin.
Mon. Pœu êsse. (sempre a parte)
Arg. Tutti i sò discorsi saran inutili.
Mon. Ghe viemmo.
Arg. Non son così abarlugaò de daghe mente.
Mon. Non se ne sà ninte.
Arg. Farò cacciâ mæ Figgio in un castello in lœugo de segureçça.
Mon. Ghe remedieremmo.
Arg. E per quello infame de Tiburçio o farò morî sotto un baston.
Tib. (a Monodda) Me pareiva uña gran cosa, ch’o se foîsse scordaò de mì!
Arg. (vedendo Tiburçio) Ah ah l’è giusto chì quello bravo arneize, che ho lasciaò a o governo da mæ casa, e a ra direzion de mæ Figgio.
Mon. (ad Argante) Oh sciô Argante gentilissimo me ralegro de veive de retorno a ra Çittæ.
Arg. (a Monod.) Bon giorno Monodda. (a Tibur) Tì Tiburçio ti hæ obedío i mæ ordini a pontin, e mæ Figgio s'è comportaò a maraveggia ben in o tempo da mæ assença. (ironicamente)
Mon. (ad Argante) Me pâ che stæ benissimo de salute, eì uña boña cera.
Arg. Benissimo. (a Tibur.) Ti no parli peçço de birbo?
Mon. Eì fæto bon viaggio?
Arg. (impaçientato) Ahime mi... Bonissimo. Lasciame un poco dî a mæ raxon.
Mon. Vorreì criâ?
Arg. Scì vœuggio criâ.
Mon. E con chì?
Arg. (aditando Tiburçio) Con quello biforco là.
Mon. Per che raxon?
Arg. Ti non hæ sentío parlâ de quello, chi è seguío in tempo da mæ lontanança da Zena?
Mon. Quarcosa ho sentío dî.
Arg. Comme quarcosa? un açion comme questa?
Mon. Creddo ch’aggæ un pô raxon.
Arg. Un ardimento pareggio?
Mon. L’è verissimo.
Arg. Un Figgio chi se voeu mariâ sença o consenço de sò Poære?
Mon. Sì signor; gh’è quarcosetta da dî sovra de questo. Ma s’avesse da dî o mæ sentimento, non ne faræ un sciaratto, uña publiçitæ.
Arg. E mì penso all’incontrario. Vœuggio che o sacce tutto o mondo. E te pâ forsi che non agge tutta a raxon de dâ in ti tacchi?
Mon. Sì signor, e son stæto mì ascì dro vostro sentimento, quando ho scoværto a scapolla, che ha fæto vostro Figgio, me son misso in i vostri panni, gh’o criaoù, gh’o fæto de romanziñe sciù o poco rispetto, che o l’ha uzaò verso un Poære, ch’o doveiva baxâ a tæra donde o mette i pê. Voî mæximo non ghe poeivi parlâ megio de mì. Ma poi me son reizo, e ho consideraò che in fondo o non ha avuo tanto torto, comme me credeivo.
Arg. Cose me vegni tu a contâ? o non ha tanto torto de conclude uña promiçça de ponto in bianco con uña, che non se sà de che paeise manco a se sæ?
Mon. Cose voreì che ve dighe! l’era destinaò così.
Arg. O questa è uña bella raxon goffa. Donque ognun pœu truffâ, arobâ, assascinâ, e portâ per scusa, che l’era destinaò così.
Mon. Caro sciô Argante voî piggæ e mæ parole troppo filosoficamente; vœuggio dî ch'o s’è per fatalitæ trovaò imbroggiaò in questo affare.
Arg. E per cose andaseghe a imbroggiâ?
Mon. Voresci forse ch’o l’avesse o vostro giudiçio? I zoveni son zoveni, e non han tutti quella prudença che ghe faræ de bezœugno per non dâ in ciampanelle. O sciô Leandro ve ne pœu êsse testimonio, che non ostante e mæ leçioin, e mæ amoniçioin, e conseggi che gh’o dæto: o l’ha fæto pezo assæ che vostro Figgio. Vorræ saveì, se a i tempi vostri quando eri zoveno eì fæto nisciuña ragassata de peizo. Ho sentío dî ch’eri allegro, vivo, che ve piaxeiva o sesso feminin, e che favi a vostra corte a tutte e donne galanti de quello tempo, e che a ogni costo voreivi uscî da uña cosa incomençâ.
Arg. L’è verissimo, semmo d’accordio; ma però sempre me son contegnuo in i limiti da demôra, e do piaxeì, e non son arrivaò a fâ o sproposito ch’o l’ha fæto lê.
Mon. Cose vorreivi ch’o façesse? O vedde uña zovena, chi ghe vœu ben; o a trœuva bella, e de boña manera, o ghe fa de visite, se ven a i discorsetti, a e parolle douçe l’amô intra, se passa a e confidenze. I parenti se n’accorzan, e con a força, e e menaççe se ghe fa uña promiçça de matrimonio in sciù doî pê.
Tib. O che furbo! che impostô! (a parte)
Mon. Voresci ch’o se foisse lasciaò amazzâ? l’è ancora megio aveì promisso de piggiâ moggê, che êsse morto.
Arg. No m’han però dito che a sæ andæta in sta manera?
Mon. Domandæ a Tiburçio, s’o ve poeu dî differentemente?
Arg. (a Tiburçio) L’han fæto promette per força?
Mon. Ve credeivi che ve dixesse uña boxia? Arg. Dunque o doveiva andâ in giustizia e fâ a sò protesta de violença, e de...
Mon. Questa è quella cosa che o non ha vossuo fâ.
Arg. In sta manera saræ stæto ciù façile a fâ deciarâ nullo questo contræto.
Mon. Deciarâ nullo o contræto de matrimonio?
Arg. Scì.
Mon. Non o fareì mai ciù.
Arg. Non o farò mai ciù?
Mon. Nò signor.
Arg. Comme non averò o dirito da Poære, e a raxon da violença, chi è stæta fæta a mæ Figgio?
Mon. Questo è un articolo, sciù do quæ non andereì d’accordio.
Arg. Non anderemmo d’accordio?
Mon. Nò signor.
Arg. Mæ Figgio?
Mon. Vostro Figgio voreì ch’o se decære un pusilanimo, e che o l’agge fæto per força questo matrimonio? O se ne guarderà ben ben de confessâ questa cosa! Non saræ de sò onô; O se mostreræ indegno d’un Poære comme voî.
Arg. Me ne façço fresco de queste cose.
Mon. Bezœugna per o sò decoro, e per o vostro, ch’o digghe che o l’ha promisso a questa Zovena con piaxeì de tutti.
Arg. E mì per o mæ onô, e per o sò vœuggio ch’o digghe a o contrario.
Mon. Son çerto e seguro ch’o non o farà.
Arg. Ghe o farò fâ per força.
Mon. Ve diggo ch’o non o farà.
Arg. O ro farà, o altrimente o dezerediterò.
Mon. Voî?
Arg. Mì.
Mon. Bon.
Arg. Comme bon?
Mon. Non o dezereditereì.
Arg. Non o dezerediterò?
Mon. Nò.
Arg. Nò?
Mon. Nò.
Arg. Questa sì che l’è graziosa! Non porrò dezereditâ mæ Figgio?
Mon. Ve diggo de nò.
Arg. Chi me l’impedirà?
Mon. Voî mæximo.
Arg. Mì.
Mon. Voî non avereì cœu.
Arg. L’averò.
Mon. Burlæ.
Arg. No burlo.
Mon. A tenerezza de Poære farà o sò ofiçio.
Arg. A non farà ninte.
Mon. Scì scì.
Arg. Ve diggo che ve o farò veì.
Mon. Bagatelle...
Arg. Non bezœugna dî bagatelle.
Mon. Ah sciô Argante, ve conoscio, seì naturalmente bon. Arg. No son bon, e son cattivo quando vœuggio. Finimmo questo discorso che me vegnan i fummi a ra testa (a Tiburçio). Và via tì pendin da forche, và a çercâ quello mascarson de mæ Figgio, che mì anderò a trovâ o sciô Geronzio per contaghe a mæ desgrazia.
Mon. Se posso servîve in quarcosa, comandæme sciô Argante.
Arg. Te ringraçio. (a parte) Ah! per cose âlo da êsse figgio unico, e non me sæ restaò quella figgia per deciarâra mæ erede. (via)