Ciaravalle 1834/Segretto per fâ e Cabale
| ←Sciaradda | Ciaravalle zeneize pe l'anno 1834 de Segretto per fâ e Cabale |
A Spedizion d'Argê→ |
Segretto per fâ e Cabale
Trovôu in t’un Tôntilio
Da Moæ da Ninfa Egeria
Ne-a grotta de Pompilio.
In primmo lêugo imbindite
Comme Cupido, & Recipe
Un Mortâ gianco d’Ebano,
Co-a Peixe ben nettezzalo,
Con l’Eguaforte sciughilo,
E con do Visco liscialo;
Recipe un gran fascicolo
De sciôette de Scixerboa,
Un fêuggio de Bettonica,
E un tomo d’Assafettida
Giascia ben tutto, & pestilo;
Recipe un gran de Succao,
Mezo gottin d’Arsenico,
Læte de Vegia un scrupolo
Sangue de Stria quattr’amoe;
Recipe mezo dramma
De Figgiêu sciacchæ a mamma,
Denti de Cagna vidoa,
Nasi de Vorpe vergine,
Sampe de Gallo celibe,
Et Gatti verdi ad libitum.
Recipe quantum sufficit
Çivette, Sbrazzoe, Alocchi,
Ratti penûghi à tocchi,
Axôu di sette laddri,
Caccaloe d’Aze a quaddri,
Træ pilloe d’Ancoa, un Spegio
Un Cudegugno vegio,
Quattro Stivæ da tromba,
Un Furgao, meza Bomba,
Un Ciaravalle nêuvo,
Un pezzettin de Grotta,
Tre Macchinette elettriche,
Un-na Pignatta rotta,
Un Circolo astronomico,
Un-na Lanterna magica,
Un Canocciale elastico,
E un Compasson geometrico;
Mettite tutto in spalla
E per mez’öa camalla.
Recipe un Bêu d’Avanna
Con bajonetta in nanna,
Da Calamitta in puvee,
Fêuggie de sciô de Ruvee,
Ortiga ben frettâ
Co-e moen pe un-na giornâ,
Un Eûvo d’Ellefante
E o Brasso d’un Gigante;
Metti sta roba insemme,
Tia zù de gren giastemme,
Misce, & remisce, men-na
Con longa côa de Vacca,
Lascighe o fî da schen-na
Fin che no vegnan Triacca,
Et adde un bottiggion
D’Inguento de Scorpion.
Passa tutto ao siassetto
Fæto de peì de micco,
Mettilo in t’un fornetto
A cêuxe[sic] ne-o lambicco,
Vestite in neigra cappa,
Piggia un-na longa trappa,
Fà sætte sati riondi,
Rompi quattorze tondi,
E con un turtajêu
Tappite a bocca, e dille,
Fintanto che a distille,
Ciù presto che ti pêu
Per berlicche — per berlocche
Cicche-Ciacche, Cicche-Ciocche,
Mangia e fighe, lascia e brocche
Per berlicche - per berlocche! ..
Tegnighe drento un dio,
Quando a l’ha ben bugìo.
Mettila in t’un gran vaso,
Dagghe drento do naso;
Perdi magara a vista,
Bruxite a lengua, assazzala;
Frettighe drento a Lista,
Mettighe a nomme Cabbala,
Eccote Cabalista.
.jpg)