Ciaravalle 1834/Prefazion
Vegno fin d'in California,
E un pezzetto ancon ciù in là,
Pe accattâ çerta Sanfornia,
Che chi a seûnna comme và,
Con tegnî ben streiti i denti,
Sentî tutti i Instrumenti
Comme ao Teatro, tale quale,
E in linguaggio muxicale
A predixe l'avvegnî!
Figgi cai, no ve stuppî,
Chè un gran Secolo l'è o nostro
De Scoverte, e d'Invenziôin;
Se pêu scrive senza inciostro,
E imparâ in quattro leziôin,
Poeì viaggiâ de genio vostro,
Andâ all'aja in ti ballôin,
Stà in te l'ægua in mezo ao fêugo,
Sotto i fiummi passeggiâ,
Comme mì a cavallo andâ,
Senza bestie carozzâ,
Senza brasse tesce, e fiâ,
Senza mutte andâ da-o cêugo..
(L'è pe-a rimma, ho dito mâ)
Ma che no ghe seggie lêugo
Doppo fâ tanti mjôin
De scoverte, e d'invenziôin,
Finalmente de trovâ
L'Invenzion de no Creppâ!
Che se sente ogni pittin
Sunnâ pose, e campanin,
E se parla ogni momento
Do sciô Tale, chi stà mâ,
Da sciâ Tale chi è aggravâ,
E per mette ciù spavento,
Fêua do Cholera chi gîa
S'è cangiôu nomme ä maottia;
Quello chi ha un magagnamento
A l'è a Grippa! (o Mego cria),
Ľatra a l'hà a freve biliosa
Un-na Gastrico-Nervosa!
Ao Figgiêu, ghe dêue o pansin?
Collerin-na! Collerin!
Tutto modda, e novitæ
Fin nei vasi di Spezïæ,
Coscì a forza de riçette,
De lansette, de sanguette,
De grecismi, de latin,
De scistemi, e perfezioin
Quando meno ghe pensemmo
A fâ leze se n'andemmo!
Voulez-vous savoir pourquoi?
Pour ne pas donner Le-Roi
Vomi-purgatif et cettea
Pour cent.... même mille fois!
Coscì ho letto in t'un-na lettea
A vapô, vegnûa de. . . fêua,
Do famoso Mego Trêua.
Ma vegnimmo a noî; do resto,
(Dunque fasso comme quello
Perdo o fî du giumescello)
Stæ a sentî ve-a sêunno presto
Per passâ a malinconia,
Ben attenti ä Scinfonia
Cose a dixe dell'Inverno.
Tempo secco, gran freiddûa,
Poca neive, giasso eterno,
In te stacche grande arsûa,
Carlevâ brillante assæ
(Nota bene) êutto bemolle,
Mascherate sminse e sciolle,
Musa Musæ pe-a Cittæ,
Flauti in fa, corni obblighæ,
Gh'è ciù feste, che ballaæn,
E ciù troffie, che tagaæn;
Festezzoéi mezi in rovin-na
Pe-i gren diexis da cäsin-na,
Gran consummo de raviêu,
Un bequadro (per chi pèu),
Obblighæ co ritornello,
Gran conçerti de sciguello,
Terminando l'avertua
C'un crescendo fêua mezûa
D'amoe, gotti, e violoncello,
(Volti presto) lamentabile:
Borse vêue, rescadamenti,
Muri giani, duî de denti,
Le-Roi subito... Cantabile
Con de scigue pe' instrumenti,
Ræne, e grilli abbrettio, amabile :
Canta l'{Sc|{Aze}} co-i mordenti
O grazioso so rondò
In la! sorve a Primmaveja,
Grave assæ, Tempo in candeja
Sempre bella, e scioïa; però
A vegniä un po disturbâ
Da un-na grande lebbecciadda,
Trombe d'ægua, ciêuve in mâ,
E s' innonda un-na gran stradda,
Nega un strombolo, e duî chen;
Gran passaggio de cû gianchi,
Beccassin, spie da nottoen
Se veddiàn finna da Banchi;
Tempo allegro pe-i villen
Che a campagna a l'ha un-na cëa
Verde d'abbondanza vëa,
Coscì dixe a cabaletta
In scie l'aja... un pò freschetta;
Bis con coro d'azenetti
Vacche, mû, bêu, bæ, cagnetti
Che no à vêuan mai ciù finî.
Scena terza; un Gallo, e detti
Cangia ton - Chichirichî;
Un adaxo ven apprêuvo
Sorve a Stæ in Sol maggiô
Cado, e vivo, (gusto nêuvo)
Perchè luxe sempre o Sô,
Træ gallin-ne han fæto un êuvo...
Cangia o tempo, a solo d'ægua
Obbligôu a stivæ, e pægua,
Zitto i flauti co-i violin,
Forte i bassi co-i trombôin,
Tempo scûo, tambûi, roullan,
Un quartetto sciorte fêua
De... (sentì che ramaddan!)
Lampi, truin, saette, gragnêua,
Pattatton, e pattattan …
Scappa scappa, orchestra vêua,
Lun-na pin-na, tempo bon,
Cianze o gran, e rie o granon,
Nasce i funzi, ingroscia l'uga,
S'arve e fighe ... coda, e fuga
Con çent'un Diexis in ciave
De faxêu, puisci e gærave
Chi finisce in ellafà;
E chi attacca o gran Finale
Per l'Autunno in ton befà,
Ch'o l'è proprio originale;
Tempo vario, Villezzanti
Tutti allegri, e festezzanti
Pe andâ a spende di dinæ;
Donne in modde invexendæ,
Parasoî per l'ægua, e o vento
Capellin a uso Chineize;
Duetto d'arpa, e corno ingleize,
Ben lighæ, con sentimento,
Brillantin, Tempo a Cappella,
Sfidda, e duello pe un-na bella;
Variazioin, moesca ä zeneize
Legnæ da orbi ben picchæ,
Cori d'ommi descordæ,
Donne unìe, cantin streppæ,
Perdia ao zêugo rilevante
Contrabasso conçertante,
Gran ripieno de violin
Dolce assai ... forte... ciannin,
I Fagotti van crescendo,
Viole pizzichæ languendo,
Narcisetti spaximanti,
Tempo perso... rallentando,
Cavalier del dente erranti,
Tempo guagno, rinforzando,
Contrattempo de trombetta,
Tempo mollo, larghezzando,
Cazze i denti à scià Pimpetta,
E a Tiburzio a perrucchetta,
Trilli, fischi, appoggiatue,
Fenuggietti, confittue
Tempo duse, oboè, ottavin,
Clarinette accompagnando,
Se vendegna, e se fa o vin
Gianco, e neigro, s'impe e tin-ne,
Allegria per San Martin
Trinkevaine! in te cantin-ne,
Di gren Consoli se fan!
Zêughi, çen-ne, canti, e balli,
Gran sussurro de timballi,
Invexendo all'indoman
De carosse, axi, camalli,
Pas de charge se ne van
Con trei-pê, fangotti, e piatti,
Pappagaggi, chen, e gatti,
Smorfie, gnagnoe, gnertoe, e sbornia,
E de lagrime coronna;
O villezzo s'abbandon-na,
E chi Tacet a Sanfornia,
Chè no a posso ciù sunnâ,
Perchè i denti me fan mâ
Ma l'appendo fito ae spalle
Di Lettoî do Ciaravalle,
Che a sunniàn quando vorriàn,
(Voeivo dî quando porriàn).
Sciâ me stagghe d'allegria,
Co-a so bella Compagnia
Bon-ne Feste.... Scignoria.