Chittarin zeneize 1881/299 Sunetto

by Martin Piaggio

←Strofoggio

Chittarin zeneize de Martin Piaggio Sunetto

Brindixi→

sunetto reçitao da l'aotô a-a fin do disnâ do "strofoggio" precedente

SÛNETTO ¹

Me sbrigo c’ûn sûnetto questa votta
E de chêu sbraggio: Evviva! alsando o gotto,
Casabonn-a, Filippi, Gambarotta,
Grasso, Candeda, Grosso e Figolotto!

Evviva i bûlli da goffesca lotta
Bertalà, Mongiardin e Marabotto,
Palazzo e Botto chi tïa troppo a scotta,
Bottâ, Manfredi o mûtto e Lûcco o dotto!

Viva l'improvvisâ nostra demöa,
L’accampamento fæto ne-a collinn-a,
L’attacco e a distrûzion di piatti a töa!

Evviva a vivandëa Parpaggiollinn-a!
Ghe faeivo ûn sûnettin finn-a co-a cöa,
Se a poese diventâ ûnn-a mongiardinn-a,²
   O torta pasqualinn-a.

Ecco fæto o sûnetto: Scignoria,
Che lëze i ätri vati a sò poexïa
   Ciù bella e ciù savoïa,

Ché finiscio con fâ l'ûltimo Evviva
A-o sciô Gandolfo e a Rosacuta, Evviva
   L’allegra Comitiva

E o Reginna chi cede o posto a Grasso,
   A Manfredi, a Bottâ, Grosso e Lûccasso!