A sanfornia zeneize 1852/Prefazion
| ←Dedica | A sanfornia zeneize de Prefazion |
A-e Campann-e→ |
| Zena, stampaja Frugon, Exemprâ conservao inta Biblioteca Universcitaia de Zena. |
Meixi son frugattando in t'un forsê
Dove tegno allûgôu qualche pappê,
Pe fortûnn-a in te moen m'è capitôu
Un scartafascio vegio e ammaloccôu,
Ne-o quæ metteivo a poco a poco in netto
Tûtte e ma bizzarrie scrite in dialetto.
Non avendo da fâ quella mattin,
Me son misso a releze un pittinin
Cose aveivo composto, e a dî a veitæ,
G'ho trovôu de scemmaje in quantitæ,
Röba meschinn-a, senza son, nè senso,
Scrita in stile o ciù frollo e o ciù melenso.
Ma sciccomme son franco in to parlâ,
E che diggo o mæ ben comme o mæ mâ,
No me tacciæ de stolida ambizion
Se ve diö che in te quello Zibaldon,
Fra tanta büra scrita zù ä carlonn-a
G'ho ascì trovôu da roba bell'e bonn-a,
De Cansoîn, di Sûnetti, de poexïe,
C'han meitôu d'ëse lette e compatïe.
Cose ho da dî? veddendo che in giornâ
Gh'è tale e tanta smania de stampâ,
Ne-e personn-e, che finn-a un Perrûcchê,
Manco bon pe rascciâ ne-o so mestê,
Tûtti i anni o n'angoscia a ciù no dî
Co-i so insûlsi Lûnaj, pin de nescioî;
E veddendo altrescì che ne-o linguaggio
Tanto illûstrôu da-e Pöexie de Piaggio,
Tralasciando i antighi, cioè o Cavalli,
O Fûggetta, o Giûlian, Defranchi e i Galli,
Fêua do Sciö Tocca e de quarch'atro amigo
(Morto), no gh'è nisciûn chi vadde un figo,
Piggiôu dall'amô proprio, e pe mostrâ
Che se ho vosciûo, quarcosa ho sapûo fâ,
Me son deciso == volontariamente ==
Senza preghëa d'amigo o de parente,
De çerne, comm'ho dito, e ciù applaudïe,
E de stampâle tûtte insemme ûnïe.
Ve e presento pertanto, Çittadin,
No dæ a mente se o libbro o l'è piccin,
Tomi grosci, gran sesto e carta reâ
Van ben spesso a finî da-o formaggiâ;
Chì invece ghe trovieì (scûzæme o vanto)
Röba mediocre da spaziâve tanto;
Ghe trovieì misso in vario metro lirico
Do serio, do bernesco e do satirico;
Ghe trovieì tante cose che tralascio
Pe no tediâve, e pe no fâve un Pascio.
Chè se poi qualchedûn (comme m'aspëto)
O vorriä fâ o pedante e l'indiscreto,
Che o no manche de dî, de criticâ,
Mi g'ho pronto pappê, penna e cämâ;
Se o vêu fâme taxeì che o dagghe fêua
De cose megio, e mi ghe vaddo ä schêua.