A sanfornia zeneize 1852/Pe-o Caffè de Quattro Stagioîn
| ←Per Messa Nêuva | A sanfornia zeneize de Pe-o Caffè de Quattro Stagioîn |
Pe unn'atra Messa Nêuva→ |
| Zena, stampaja Frugon, Exemprâ conservao inta Biblioteca Universcitaia de Zena. |
BONN-E FESTE
di Camê do Caffè
DE QUATTRO STAGIOIN
L'è bello Arvî, che lento
Deslengua pe-a campagna
In belli rien d'argento
O giasso da montagna;
Che o ventixêu innamuôu
Maliziosetto axilla
Con mille scioî do prôu,
E dappertûtto brilla
Pe-i vasi, in ti giardin
A rêuza e o giäsemin,
E ne rallegra o coêu
Cantando o roscignêu;
2
L'è bella a Stæ, che in belle
Spighe nascendo o gran,
Sciallandose, e verzelle
Prepara zà o villan;
Vedde o pastô contento
Moltiplicâ l'armento,
I campi, i boschi, i bricchi,
Tûtti de frûta en ricchi,
E l'è ûnn-a vëa cöcagna
L'ëse de Stæ in campagna;
3
L'è bello finalmente
L'Autunno - nêuvamente
Ne-o pröu cresce l'erbetta,
Ghe treppa o bæ, a pegoetta,
Spuntan funzetti a sciammi,
L'erboo denêuvo o scioisce,
Ceigan de frûta i rammi,
A vigna a l'appartoisce,
Se trinca do bon vin
A-i Morti e a San Martin;
4
Ma ünn-a stagion ciù bella,
Ciù allegra comme quella
Diletta dall'Eterno,
Santa stagion d'Inverno,
Ah che per un Camê
No gh'è l'eguale in Çê!
Se i rammi aridi tronchi
Mettan spavento e orrô,
Se fra deserti e bronchi
Urla dä famme o Lô,
Se solo pe-a montagna
Gh'è risso da castagna,
Bello per noî l'inverno
O risplendiä in eterno,
Chè intrandoghe Natale,
L'è ûzansa generale,
E da mill'anni in pê,
De regallâ a-o Camê
Chi ha sempre avuo l'onô
D'ëssighe servitô
Un bon Dinâ da noxe.
Ne piaxe e cose leste,
Sciù via scià mostre a Croxe...
Ghe demmo e Bonn-e Feste.