A sanfornia zeneize 1852/L'Ombra de Ballin
| ←A-e Campañe | A sanfornia zeneize de L'Ombra de Ballin |
In morte de Martin Piaggio→ |
| Zena, stampaja Frugon, Exemprâ conservao inta Biblioteca Universcitaia de Zena. |
L'OMBRA DE BALLIN
IN LODE
DO PADDRE UGO BASSI
ne-o so ritorno a Zena.
Canto quello che i atri han zà cantôu
In atre lengue, e mi o canto in zeneize.
Vestïa tûtta de rêuze e giäsemin,
Semennando per tutto un grato odô,
Da-i monti do Bezagno unn-a mattin
Spuntava l'Alba messaggëa do Sô;
I roscignêu, e cardænn-e, i berbexin
Incomensavan a canson d'amô,
Tûtta spirava amô maddre Natûa,
Ville, boschi, fossoeì, monti e ciannûa;
2
Mi solo ermitto, e mezo appascionnôu,
No so se fosse ciù dä Cava o ä Strïa,
Sorve un schêuggio lezzendo ëo lì assettôu,
Dove sciûsciava fresca ûnn'arbaxïa;
Conscideravo intanto a valle, o prôu
De margaitte e viovette greminïa,
Quando inderrê me vorzo, e lì vexin
L'Ombra ghe trêuvo do Pescôu Ballin.
3
Pallido e giano, armôu do so çimmello,
Avendo a fronte incoronâ d'öfêuggio,
In to çestin treì bûddeghi e un nazello,
Ch'o i aveiva piggiæ frammezo a un schêuggio,
D'un portamento interessante e bello,
Bocca chi rieiva, scintillante l'êuggio,
Cantando versci in lode de Maxinn-a,
Me veddo comparî l'Ombra divinn-a:
4
Piggio un resäto! e comme a un che dappresso
Ghe picca o tron, ch'o resta sbalordïo,
Anzi ciù gianco che o pappê, che o gesso,
O cazze in tæra lungo, stramortïo;
Coscì a quella Vixon l'è a mi sûccesso,
Che son restôu lì fûto, arrensenïo,
Senza sangue, ma Lê chi vidde tûtto,
Co-a man presto o me dè soccorso e aggiûtto:
5
Sta sciù, fatte do côeu, non aggi puïa,
O me dixe façendo un fattoriso,
Mi son quello Pescôu che in compagnia
De qualche maoxo ho e mæ pascioîn diviso;
Per ti me son partïo da quella scioïa
Spiaggia di Giûsti, da-o beato Eliso,
Per ti, per onor to questa mattin
L'Ombra te parla do Pescôu Ballin;
6
E comm'a l'è? o repiggia, ti che anchêu
Ti doviësci fâ versci a rompicollo,
E sûssûrrâ in Parnazo e nêuve Sêu,
Fâte l'arpa imprestâ da Barba Apollo,
Ti stæ co-e moen in man comme i figgiêu,
Sorve un schêuggio bägiando comme un sciollo,
Anchêu che tûtto Zena e ciù un caroggio
Pe un sûperbo Oratô battaggia a doggio?...
7
Oh mi beato træmïa votte çento!
Se a-i tempi mæ vivendo in ta sentinn-a
Di bacögi gh'aveivo un argomento
Da poeì comm'aoa regallâ ûnn'Ombrinn-a,
Unn-a Treggia chi fosse do mæ stento
Degno compenso, e rallegrâ Maxinn-a;
Ma indærno, e se ho cantôu de qualche Dûxe,
Fù per dâ dell'incenso e sciaccâ e prûxe;
8
Ti incangio che ti hæ a diccia de poeì vive
Ne-i tempi che l'Italia e tûtto o mondo
Porze argomenti nobili da scrive,
Resveggiôu dall'obblio vile e profondo;
Ti che in ti stesso ti me fæ revive,
E fêua Reginn-a ti no g'hæ o secondo,
Anchêu che cazze l'êujo in scï bacilli,
Ti stæ chi a vedde sghêuâ farfalle e grilli?
9
Coraggio, allon! resveggite, e seguindo
A corrente de quelli c'han stampô
Tante vescie a postisso, de quæ Pindo
O ne restò stordïo, scandalizzôu,
Fa vedde che se timido, partindo
Ugo Bassi da Zena, ti ê restôu
Ne-o porzighe ûnn-a sciô, fù pe-a raxon
Che n'ëa ancon tempo de sparâ o cannon;
10
Fagghe vedde che a Mûza portoliann-a,
Se a se veste in pessotto e in saccanò,
A non è poi cosci tanto paizann-a,
Comme a stimma çertûn che mi no so;
Chè se spuïosa a sta sempre in ta tann-a,
L'è che troppo rammarichi a provò;
Meschinetta! mi quando a frequentava
De poeì piggiâ braççetto a se sciallava!
11
Ecco quell'Ommo è ritornôu che tanto
Ne-a Quarexima scorsa o fè fûrô
Da-o Pûlpito fra voî, dove d'un santo
Fêugo avvampando, d'un celeste ardô,
L'Evangelio de Cristo sacrosanto,
Novello Atleta in campo do Segnô,
Franco o bandiva, e a libero diletto
O s'accattava d'ogni coêu l'affetto;
12
Quella lingua do Çê, sola fra mille
Versâ nell'arte do parlâ de Dio,
Che vibrando evangeliche scintille
A deslenguava l'animo ciù ardïo,
Che coraggio infondeiva all'imbecille,
E a dava all'empio minaccioso un crïo,
Quello Mâ, quello Sô d'aurea eloquenza,
Eccolo torna donde o fè partenza;
13
Cantine e lodi, e digghe comme Zena
Tûtta a tripûddia in véddilo tornôu;
Digghe comme l'ûzûa co-a tresca oscena
Per mezzo de so Prediche han sfrattôu;
Che o mâ chi paeiva andâsene in cancrena,
Tanto o s'ëa zà ne-i osse inveninôu,
Per Lê, per l'alta so filosofia
Mûtto e a galoppo o se n'andæto via;
14
Digghe che quando o l'avvampava in faccia
Minacciando a vendetta do Segnô,
A quella fëa, terribile minaccia
L'empio o tremmava d'un crûdele orrô;
Ma se poi fresco ventixêu chi scaccia
E nûvee, e brilla ciù schillente o Sô,
Se o confortava un animo stordïo,
Bella speranza o gh'aççendeiva in Dio;
15
Digghe che a fianco perlisciâ in rossetto,
Tûtta a rebighi e in testa ûnn-a coronn-a
De viovette e de rêuze, che adaxetto
Son cresciûe morbidette in Eliconn-a,
L'Eloquenza ghe sta streïta a braççetto
D'ûnn-a severa nobile Matronn-a,
Ch'a combatte, ch'a vinçe, e a vanta a gloria
De poeì portâ sorva e pascioîn vittoria.
16
Chè se pallida Invidia, d'arescoso
Vibrando o colpo, a tenta soffocâ
L'alto Genio chi vola ardimentoso
Contra o Sô comm'ûnn'Aquila reâ;
Chè se un strêuppo immondiscimo e schifoso
De viliscime Bestie, atte a strisciâ,
Ardisce e tenta d'impedîghe o sghêuo
Fissôu nell'ampia immensitæ do vêuo;
17
Digghe che parla in Lê quello gran Dio,
Chi va a-o passeggio sorva i äe di venti,
Quell'Eterno che a-o Çê dà moto e gïo,
Chi fissa a tæra, e fa corrî i torrenti;
Lê o gh'avvampa o çervello, e o rende ardïo,
Lê do Çê o gh'arve e limpide sorgenti,
Da lê difeizo, sostegnûo, protetto,
Diventa santo ogni terreno affetto;
18
Che ciù ?... tante atre mille qualitæ
E infinite virtù d'accordio unïe,
Rariscime, in Lê solo radunæ,
E che i atri han fra tûtti scompartïe;
Voxe, presenza, gesto, abilitæ,
Che a so capriçio ve fa cianze e rie,
Fêugo ch'infiamma, sant'Amô ch'incanta,
Chi rapisce ogni coêu, celebra e canta;
19
Nè fra i maoxi de lodi giûstamente
A tant'Ommo tesciûe no te scordâ
De dâ resäto a quella sorprendente
So generositæ tanto vantâ;
No gh'è vegio o figgiêu fra a povea gente
Chi no gh'agge in so coêu fæto ûnn'artâ,
Che grato a-i benefizii e a tant'amô
No benedigghe in Bassi un Protettô;
20
E oh! perchè no revivo in questo mondo
Torna unn-a votta solo un pïo de gallo!
Che scì che allöa co-i tremmagi da-o fondo
Do Mâ peschieivo un loasso da regallo!
Pe un momento a lasciâ quello giocondo
M'adattieivo perfin lêugo de sciallo,
Dove spirito pûo vivo, e con Dio
Me veddo sotto i pê de stelle o gïo.
21
Oh! o portento che l'è quest'Oratô,
Questa rara Cometa a comparî!
Questo Mâ de dottrinn-a, questo Sô
De virtù, chi feconda e frûti e scioî!
Ti feliçe! che a-o manco a fâte onô
Ti vivi in scöso do ciù bello Arvî!
Mi desgraziôu! no posso che vissûo
Son sempre a-i tempi da incensâ o vellûo.
22
Chi l'Ombra de Ballin dìndome addio,
E baxandome a fronte, in t'un momento
A m'è sparsa da-i êuggi, sbalordïo
Lasciandome, lì squæxi in svenimento;
Mi inûtilmente l'ho ciammâ c'un crïo,
Che lê a s'è missa a cavallon do vento,
E trapassando e nûvee de premmûa,
Drita a l'è andæta dond'a l'ëa vegnûa.