A sanfornia zeneize 1852/L'Addio a-o Chollera
| ←In morte de Martin Piaggio | A sanfornia zeneize de L'Addio a-o Chollera |
Contro o Strofoggio do Perrûcchê→ |
| Zena, stampaja Frugon, Exemprâ conservao inta Biblioteca Universcitaia de Zena. |
L'ADDIO A-O CHOLLERA
Canson
Scialla! scialla! - doppo o vento
E o tempûsso burrascoso
Spuntò o Sô ne-o firmamento
Ciù schillente e lûminoso;
Finalmente a tramontann-a
Discipò tanta buriann-a!
2
Quello Chollera insolente,
Che chì a Zena o vendegnò
Tante vitte impûnemente,
Scialla! scialla! o se n'andò:
Bando a-e lägrime, a-i sospii,
Che i so trionfi son finii!
3
Dove o Sô nasce a bonn'öa,
Dove o va a cacciâse in mâ,
Questo figgio de scignöa
Dappertûtto o vòsse andâ,
Semennando dappertûtto
Stragi, orrô, rovinn-e e lûtto!
4
Ma lontan dove o l'è stæto
Solo appenn-a o i ha frixæ,
Poche vittime o l'ha fæto,
No son stæte che brûghæ;
Dappertutto, fêua che a Zena,
Ghe sbraggiòn: ïsa Manena!
5
Da noî incangio, meschinetti!
Ogni bägio, ogni momento
Giava intorno i cataletti,
Giava intorno o Sacramento,
De lettëe, de bûscioe giava. . .
Se finiva andando ä Cava!
6
Oh che tempi! Meghi e Prævi
(Meno quelli ch'ëan scappæ)
Paeivan tanti massaprævi
Sempre in moto e sparpaggiæ,
Giorno e nêutte se scorrivan
Pe ascistî quelli che moivan!
7
Moivan tûtti! no gh'ëa verso
De placâ l'ira divinn-a;
Ean i voti un tempo perso,
I ripari ûnn-a papinn-a;
Moivan tutti! e da-o terrô
S'ecclissava finn-a o Sô!
8
Quanto lûtto! se veddeiva
Spirâ o majo in angonia,
Lì da-i fianchi ghe cazzeiva
A moggê piggiâ dä puïa,
Moiva o poæ, moiva i figgiêu,
Morto o fræ gh'andava a sêu!
9
Quest'ëa ninte stradde e ciasse
Senza un can chi fesse bôu!
Gexe, Otoj, Teatri, Biscasse,
Dappertutto l'ea serrôu!
Ricchi, Povei, Titolæ,
Tûtti in casa ëan baricchæ!
10
Se quarcûn poi s'incallava
De sciortî a fâ mezo gïo,
Comme canna o vacillava,
O l'ëa tiôu, verde, patïo,
O l'odoava ogni misê
Un malocco de pappê.
11
Sci scignor! no gh'ëa rispetto
Ni pe-o ricco o pe-o despêou;
Forti e deboli in to zetto
Tûtti a mûggio o l'ha cacciôu,
O scoläo cö Professô,
E o Padron cö servitô!
12
Ma o to trionfo finalmente,
Brûtto Chollera abborrïo,
O l'è lesto - in faccia ä gente
O so brûgo ha rotto Dio;
Tanto sciato in t'un momento
O s'è sperso comme o scento.
13
Dunque addio... vanni a-o marviaggio
Mille miggia e ciù lontan;
Segge a nave de bersaggio
Chi te porta all'ûragan,
Posse infin tra schêuggio e schêuggio
Rotta arvîse e passâ p'êuggio;
14
Vanni, addio... non ciù dappresso
A bandëa s'alze da morte,
Non ciù un pallido çipresso
Segge insegna a-e nostre Porte,
Ma pertûtto in generale
D'allegria spunte o segnale.
15
Scialla! dunque se battagge
E campann-e d'allegria,
Spare a bomba, e che se sbragge:
O Cholëra è andæto via!
Che se cöre tûtti a reo
A cantâ in Gexa o Teddeo.
16
Presto presto che ritorne
E Bellezze disertæ,
O Passeggio che s'adorne,
Vegne i Ricchi (co-i dinæ),
Che se spende e che se spande
Allegria da tûtte e bande;
17
Torne o bravo (chi è scappôu)
Pe levâ e tägnæ all'impiego
Mostre a faccia o barricôu,
Vegne o Præve e torne o Mego;
N'è ciù tempo d'aveì puïa
Che a polenta a l'è buggïa.
18
Ognun vante e so prodesse
E i so aggiûtti (da lontan),
Che - benchè o no se veddesse -
o stentava comme un can
Pe-a so Patria e pe-i so Fræ
Cholerosi (abbandonæ)!
19
No ghe n'è pe-a puïa d'unguento,
Ognun çerca de stâ in vitta,
Mangiâ e beive senza stento,
E... ma termino a mæ schitta,
Dunque incontro un cæto brûtto. . .
Bonnefighe! ho dito tûtto. —