A sanfornia zeneize 1852/Contro o Strofoggio do Perrûcchê
| ←L'Addio a-o Chollera | A sanfornia zeneize de Contro o Strofoggio do Perrûcchê |
Bonn-e Feste do Zizzoa→ |
| Zena, stampaja Frugon, Exemprâ conservao inta Biblioteca Universcitaia de Zena. |
CONTRO O STROFOGGIO
DO PERRUCCHÊ
sorva a Stradda Carrattëa
Doppo un anno e qualche meize
Che e chittare ëan tûtte appeize
A ûnn-a rovee, e vergognose,
Tûtte in pessi dall'arsûa,
Stavan mûtte, dormiggiose,
Descordæ, pinn-e de pûa;
2
Doppo un pesso che pe-i bricchi
Do Parnaso non ardivan
Ciù treppâ tanti buricchi,
Perchè e Mûze te i scorrivan
Giûstamente cö torseôu
De galoppo verso o prôu;
3
Finalmente graziadio!
Per fâ vedde a tûtto Zena
Ch'o l'ha sempre o barbacïo,
Cioè de Mazzo a cantilena,
Finalmente s'è addesciôu
Un bell'Aze, e o l'ha... rägnôu!
4
Mi no parlo de Reginn-a,
Comme canna zà provâ;
Lê s'o l'arve a-i versci a spinn-a,
Ch'o se frette co-a Comâ,
O l'è lepido, armonioso,
Pin de frizzi, spiritoso,
Dappertûtto o l'è gradïo,
Ciammôu bravo e riverïo.
No neghiö con tûtto questo
Che in te l'ûltima Canson
Sorve a Ciassa de S. Loenso,
O no gh'agge dæto a-o resto,
Zù scrivendoa de sprescion;
Serve assæ dâ de l'incenso,
No ghe veddo o formidabile
Nostro Piaggio incomparabile;
Mille votte pe-o passôu
De ciù belle o n'ha stampôu,
Che ghe fan molto ciù onô;
Ma o Raffæ cö so pennello,
Mascimiscimo Pittô,
O fè sempre tûtto bello?...
Mi parliö de quella sûcca
De Poëta chi rimmezza
Quand'o fa qualche perrûcca
(S'o l'e bon), o che o sbarbezza,
E che a-o Pubblico o l'ha misso
Lûnedì quello pastisso
Sorve a Stradda Carrattëa.
Ma comm'æla?... e son messê
De risponde a un Perrûcchê,
A un alluôu chi se protesta
D'ëse un Aze senza testa?...
No l'ho manco per l'idea,
Bezêugnieva ëse un gran stolido!
Che o se tegne a so Canson
E o l'allêughe in to cotton,
Ch'a l'è proprio un lapis-lazzuli,
A l'è un êuvo d'Assenscion!
« Quanto a mi no me n'intrigo,
« Staggo a vedde e me bäsïgo,
Che se a voese criticâ
Ghe l'aveivo o mæ da fâ! !...
No gh'è un verso chi no pecche,
No gh'è un senso chi no secche,
Rimme insemme appottiffæ,
A maggior parte sbagliæ,
Un parlâ da carbonê,
Per non dî da Perrûcchê,
Tûtta erroî d'ortografia,
Che ghe n'è de tûtte e chêutte;
E mi devo criticâ
Un pappê bon pe-o panê,
Per poi fâme battezzâ
D'aveì fæto a valentïa
D'andâ contro a un Perrûcchê?...
Non me o sêunno manco ä nêutte!
Chè se ho scrito sta Canson
Con do fêugo, g'ho raxon,
Chè o m'ha misso troppo futta
Con piggiâme impûnemente
Pe un strofoggio meza mutta,
Che no a vä o Stampôu e ni lê,
Manco o chef di Perrûcchê,
E mi sciollo l'ho accattâ!
Ma l'ho scrita solamente
Per o Pûbblico avvisâ
Ch'o no segge tanto bon
Da lasciâse lûxingâ
D'accattâ questa Canson,
Vêuggio dî questa bûgnata;
Perchè a l'è unn-a bricconata
De tiâ zù de mutte ä gente
C'ûnn-a pægia fradellata:
E comm'æla? semmo a-o Bracco?
Che se forse o l'esponeiva
O bezêugno ch'o l'aveiva
De træ mutte pe-o tabacco,
E chi o l'è chi ghe e negava?
Finn-a mi ghe e regallava
(Benchè poeta)... basta dîlo;
Ma pretendile de filo
Con voeì fâ l'indifferente,
E streppâ e caccàloe ä gente
Sotto o manto d'impostûa!!...
Ch'o se pigge un carubbin,
E che o vadde de mattin
A aspëtâ e carrosse in Rûa.
O insensôu de Perrûcchê,
Manco bon pe-o to mestê,
Questa votta da mincion
Ti l'hæ fæta in to carbon!
Me paeì quando ti scriveivi
Queste balle ti creddeivi
Diventâ un nêuvo Burchiello,
E de sghêuâ comme l'öxello
Che è in te chêusce a Barba Giove!
E ancon, sciollo! ti no sæ
Che i Burchielli son creppæ,
E che un strûsso no pêu sghêuâ
Comme ûnn'aquila reâ,
Tanto ciù se o no sa dove?...
Per caitæ, Poeta stoppin,
De rimmâ lascia o morbin,
Ch'o l'è tempo cacciôu via,
Ti no g'hæ gaibbo e ni ghia;
Ma continua a fâ o meştê
Scignorile Perrûcchê,
Con trattâ ben o razô,
Chè te zûo ti ghe guägniæ
Ciù de stacca e ciù d'önô:
Primmo punto ti n'aviæ
De bezêugno de raspâ
Tûtte e mûägie pe çercâ,
In fâ e barbe, de tägnæ,
O aveì dunque sempre o gatto
Chi te stagghe attento a ogni atto
Per ammiâ se cazze ninte;
Poi chi sä quella cazann-a,
Chi vegniä sotto e to grinte
S'a sentiä sûnnâ a campann-a
Che ti è poeta, idest matto?
Cäo Perrûcca, anc'ûnn-a votta
Mi te o diggo, molla a scotta
De fâ versci e de mostrâ
I to poetici talenti,
Ch'o n'è pan per i to denti;
Fa de barbe, e no stampâ
Che l'è megio!.. dunque presto
Primma ancon ch'o segge lesto,
Cäo cameadda, cäo Poëta,
Gh'è l'Uspiæto chi t'aspëta.