Çittara zeneize/Quando de scœuggio in scœuggio va Maitiña
| ←Invia a Muza a-o bosco, pe cantâ di arme | Çittara zeneize - Çernia de quarche rimme de Quando de scœuggio in scœuggio va Maitiña |
Da Miña in fœura, chi me vè per Dê→ |
| Zena, Franchello, 1745 notte do Prian |
I.
Quando de scœuggio in scœuggio va Maitiña,
Accœuggiando patelle, gritte, e zin,
L'ægua deven crestallo puro e fin,
E de sarâ ven doçe ra mariña:
E l'arega, e l'areña e l'erbettiña
Deven d'oro, smerado, e de rubin;
E ri pesci d'arinto brillarin;
E Nettun sença in testa se ghe inchiña.
E ro Sô, per no cœuxera, s'asconde
Ma ne fa lumme in cangio ro sò viso:
Ro vento treppa intre sò treççe bionde.
Ma no treppo zà mi, perchè m'avizo,
Che se a se vè sì bella dentro re onde,
Che a no amme sarvo lê, comme Narçizo.